الارهابيون… قادمون….
بقلم : جواد كاظم اسماعيل ..
جماعة ربعنا خلونا نسولف.. ترة طگت حوصلتنا والعباس…!!
عمي عليمن خابصين نفسكم وخابصينه وياكم رجع فلان ورجع علان… هو منو رجعهم غيركم بس لاتگلولي رجعتهم حسنة ملص..!!
ثم اريد اعرف منو الي صنع هاي الاسماء:
رافع العيساوي
علي حاتم سليمان
خميس الخنجر
مشعان الجبوري…. واخرون
ومنو سقط هاي الاسماء حتى صرنا نسب ونشتم بناء ً على اتهاماتكم لهم طبعا ويجوز ارتكبنا ذنب بسبب شتمنا المبني على اتهام السياسي للسياسي؟
ثم اريد اعرف منو رجع هاي الاسماء للواجهة وقسم منها صاروا قادة سياسيين وزعماء كتل ؟
اذا تگلولي الي صنع هاي الاسماء هي داعش والارهاب، واذا تگلولي الي سقطهم هي مواقفهم..!!
طيب اذا هم هكذا ليش اتفقتوا على عودتهم ومسحتوا التهم عنهم، ترة بدون موافقتكم مستحيل واحد منهم يرجع للعراق،،
اما اليوم كل واحد منكم مطلعلي بيان يستنكر عودة العيساوي وعلي حاتم سليمان فهذه البيانات ماعادت تنطلي علينا، يجوز كم ساذج مثلكم تنطلي عليه هاي القضايا، وهي سوالفكم بعد سولفوها على الدبة لان صرنا مفتشين باللبن كلش مو مثل الاول چنا مغمضين..!!
عيوني لاتلفون ولا ادورون… اعترفوا وقولوا ان عودة هؤلاء جاءت لعقد صفقة سياسية بتدخل خارجي لخلق زعامات سنية جديدة قادرة على هيمنة زعامة الحلبوسي وبالتالي تفتيت التحالف الذي معه.
اني متأسف فقط على الدماء التي سفكت بسبب كذبكم ومتأسف على الارواح التي راحت بسبب خداعكم ونفاقكم ومتأسف على العقول “المتصلبخة” التي لازالت مصدقة بكم وتنظر لكم نظرة التقديس… الا تعسا لكم ولهم.
جواد كاظم اسماعيل